È cosa 'e niente! È cosa 'e niente!
Figlio mio! Figlio mio!.. Addo' sta?
Nun é niente!
Nun avite appaura!
Addo' sta?.. Vito!.. Figlio mio!.. Addo' sta?..
Sto ccá, sto ccá, sto buono… (esce nella piazzetta)
Uh, figlio mio!.. Io mo moro!..
Io sto buono!.. È stata na cosa 'e niente… Mm'é benuto nu sbenimento…
Uh, figlio!.. E mò comme staie, comme te siente?.. Vuo' niente?.. Te ne vuo' venì 'a casa?..
V'aggio ditto ca sto buono, oí ma! È stato affetto 'e debulezza…
E bienetenne 'a casa! Te faccio nu poco 'e broro…
Avite visto, ca nun é niente!
Che buo' fa? Vuo' venì 'a casa?..
Io v'aggio ditto ca nun è niente! Io v'aggio ditto ca sto buono! E mò si nun mme ne vaco dinto mme fenesco 'e attaccà 'a neveratura! (Rientra nella bottega)
Ma sta buono o no? Ma che ll'è benuto, se po' sapé, o nun se po' sapé?.. Ma vuie pecché nun mm' 'o vulite di'?
Giesù, niente!
'Onn'Amà?..
Ma ched'é, nun 'o ssapite stu figlio vuosto c'ha fatto?
C'ha fatto?.. Ma che mme vulite fa vení na cosa!..
Ha fatto nu voto…
Nu voto?.. Comme?.. E che voto?
Stu figlio vuosto caro caro ha fatto 'o voto 'e se spusá na femmena malamente. Chesto ha fatto.
Chi?!.. Vuie che dicite!.. Ha fatto 'o voto… Uh, mamma mia! Uh, faccia mia!.. Ah, nun é overo, nun é overo!..
Addimannate…
Nunzià?.. P'ammore 'e Dio! Diciteme 'a verità!.. Comme! Vito ha fatto stu voto?.. Sufì, é overo?.. Neh, Assú… diciteme 'a verità!.. Ma é overo?.. Uh! faccia mia! Faccia mia!.. Addo' sta?.. Vito?.. Addo' sta?.. (move verso la tintoria)
'Onna Ró, embé? Lassate 'o sta, mo! Cheste so cose ca po' s'acconciano. Mo 'assat' 'o i'…
Vuie 'o facite fenì 'e cadé malato!
Vuie che dicite? Ma vuie che dicite? Ma vuie avite ntiso chillo c'ha fatto?!.. Comme! A na femmena malamente!.. E sta faccia mia addo' 'a vaco a mettere?.. Uh, mamma mia, e che ddelore ca mme steva astipato a notte a notte!.. (si volta) Neh, 'onn'Amá?.. Vuie che mme dicite?..
So' fatte ca nun mm'apparteneno. (Scompare nel vicolo)
'Onn'Amá!.. 'Onn'Amá!.. E sentite!.. (La rincorre. Scompare anche lei nel vicolo)
Che ve credite ca stu fatto fenesce mo?
Nunziá, mammema addo' é ghiuta?
'A vedite llá, cu donn'Amalia…
Capite? E chella mm'é mamma!..
Ma mò che bulite fa? Ve vulite pigliá collera n'ata vota? Mò penzate 'a salute e nun ve nn'incarricate. Facite 'e cose revulare, e a chillo bello Giesú nun lle date collera!
Io mme so' raccummanato a isso (lo guarda, sberrettandosi) e mme pare c'aggio fatto cchiú 'e chello c'aggio pututo. (Si copre) Abbasta ca isso nun mme fa ncuietá 'a nisciuno!.. Pecché io tengo brutte ntenzione!
Va buono, non date audienzia 'a gente…
Basta, venimmo a nuie. Avite mannato a accattá 'e ccere?
Qua cere?
'E ccere d' 'o voto.
E quante ce ne vonno?
Pe revula pe revula ce ne vulessene tre libbre.
Embé, se piglieno. C'ato ce vò?
Duie sciure frische, pe bello vedé…
E va bene… Che ato?
Avimmo ditto 'e ccere, 'e sciure… Ah!.. Mo' ce scurdavemo 'o mmeglio… E 'a messa pezzuta?
Uh, overo!
Sapite c'avite fa? Quann'è dimane susiteve nu poco cchiú ampresso e ghiate addo' rettore 'e Sant'Eliggio. Chillo scenne albante iuorno pe dicere 'a messa, e 'o truvate sicuro. Faciteve dá 'a fiura. Anze, vedite c'ha dda tené pure 'e mmedaglielle.
Bé…
Mettite 'a fiura int'a na guanterella e ghiate attuorno. Chello che facite…
Accattate 'e ccere.
Accatta 'e ccere? Essí! 'E ccere ce l'ha dda mettere isso. (a Vito) Chello che facite serve p' 'e mmesse…
Diciteme n'ata cosa…
'Onna Rosa! 'Onna Rosa!
Iate, ca po' parlammo. (Vito rientra in bottega)
Nunziá, stateve bona.
Addo' iate?
Mo ce vedimmo… (va via con le altre)
«Che passiona che ttengo a stu core! Nennella mia sta bona malata! So' vinte juorne…»
'Onna Ro', ve vulisseve fa sta capa? (sciogliendo il grembiale che ha attorcigliato intorno alla vita)
Ve ringrazio, Nunzià…
Allora bona sera. Vengo dimane 'a casa… (via per la destra. Il ciabattino seguita a martellare la suola)
Vuie ccá state? (Rosa lo guarda senza rispondere) E nun ve ne iate 'a casa? 'A casa sta sola.
Lasse 'a sta sola!
Ch'é stato, neh, mà?
Niente.
Ah, bé… Quanno nun è niente tanto meglio.
Ch'é stato? Vuo' sapé pure ch'è stato? É stato ch' 'e' fatto nu bello voto, 'e' fatto! Nu voto ca fa proprio onore a tutta 'a razza nosta!
Chest'é? Io 'o sapevo.
Vi', tu me vuo' fa murí primmo d' 'o tiempo!
Mme pare ca site vuie ca vulite fa murí a me!
No, si' tu ca mme vuo' amariggiá sti poche ate iuorne ca tengo!
Site vuie, so' io… Va bene, so' io! So' io, sissignore!.. E nun ne parlammo cchiú!
Haie raggione! A me chesto mme spetta. Sgarbe e male parole…
Chesto v' 'o penzate vuie. Io nun v'aggio risposto malamente.
E nun me puo' risponnere malamente, 'e' capito? Io te songo mamma e tu nun' 'è 'a sta a sentì a ll'ate; 'e' 'a sta a sentí a me! (si alza)
Chesto fino a nu cierto punto!
No! Fino all'urdemo punto, 'e' capito?.. Senza ca m'accummience a mancá 'e rispetto!
Oi ma', nun accumminciate a mbrugliá a utile vuosto!.. E nun mme ncuitate!
Stu voto levatillo 'a capo! Doppo ca io avesse murí ciente vote e no una, na tale e quale comme a chelle ca vaie truvanno tu, int' 'a casa mia nun ce trase, nun ce trase e nun ce trase! (Urla. A un palazzetto si apre una finestra e una donna si affaccia a udire)
Nu' strellate e nun accuminciammo a fa ll'opera mmiez' 'a strata!
Ll'opera 'a vuo' fa tu, e nun fa abbedé ca mo te miette scuorno, famme stu piacere! (S'apre un'altra finestra e s'affaccia un'altra donna)
Iatevenne 'a casa!..
Mo' mme ne cacce pure?
Io ve dico iatevenne 'a casa!
Mo' mme ne cacce pure! Mo' si tu 'o patrone! Mo' faie tutte cose tu! Mo' cumanne tu! 'A quanno è muorto pateto mme staie ntussecanno 'a vita mia!
Nu' strellate! 'O bbedite ca facite affaccià 'a gente!
Nun hanno a che penzá! Penzassero 'e ccorna lloro ca ne teneno assaie pure lloro! (Le finestre si rinserrano)
'Onna Ró, venite acca', sentite… (cerca d'allontanarla)
Io 'o ssaccio chi v'ha mannato 'a chesti parte! Che ve credite ca nun 'o ssaccio? Ma cu me é tiempo perduto! Hanno muzzecá ccá nfaccia! (Si tocca il gomito) Io faccio chello ca mme pare e piace a me!
E fallo, fallo! Chi te dice niente?! Chi vo' niente a te? Fallo! Fallo!
E pecché venite ccá bbascio? Pecché ve facite vení tutte sti tirepetirre? Io sto malato!.. Vuie a chi vulite atterrá? Vuie site, ca mme vulite vedé muorto!
Zitto, embé!
Io! Io, ové? (al Cristo) Tu 'o siente?
Sì, sì, vuie proprio! Vuie site stata ca mm'avite fatto accussì! Ca si mm'avisseve fatto e n'ata manera, c' 'a bbona salute, tutto chesto nun succedarria! A chi aggia ringraziá? Nun aggia ringraziá a vuie?
Haie raggione, ossá! Chesto ca mm' 'e' ditto ogge Dio t' 'o pozze perdunà!
Stateve zitta, ca chillo ha pazziato…
E dicite a chella perzona ca v'ha mannato 'a chesti parte, ca se facesse 'o fatto suio, si no io faccio revutá 'o quartiere!
Zì, zì!.. Stateve zitto!..
'O quartiere 'o faccio revutá io, 'e' capito? Io scuorno int' 'a casa mia nun ne voglio! Nun ne voglio! (Si ricomincia ad affollare la gente)
Stateve zitta!
Iatevenne, sì no comm'è bbera 'a iurnata ch'é ogge vuie mme facite fa chello ca nun aggio maie fatto!
Pecché, che faie? Mme vatte? Mme vulisse pure vattere? E tu vatteme!..
E quanno ve ne iate 'a parte 'e dinto?
Iammuncenne… (cerca di condurla via)
Lassateme, 'on Má! Vuie 'o bbedite a che simmo arrivate! Nu figlio c'amminaccia 'a mamma! E n'ato poco mme vatte pure! 'O ssape sulamente Dio chello c'aggio patuto p' 'o fa! E mò dice ca io ll'aggio fatto accussì, capite, ca io só stata!.. Ah, ca io avarria ringrazià a pateto ca m'ha lassato nnanze chisto bello suggetto!
Zitta!
E 'o tenite stu barbaro curaggio e 'annumenà a patemo? Patemo è muorto e vuie nun le putite purtá manco 'e scarpune, muorto e buono!
Ma chesto che significa?.. Iatevenne dinto…
Haie raggione, haie raggione, mo' si tuttecose tu, mo mme ne può' cacciá pure d' 'a casa!
Me,' ca chillo pazzeia…
Sentite a mme…
Io nun mme ne fido cchiú!
Io! Io nun mme ne fido cchiú! I' poco ato campo! Tu mme staie atterranno iuorno pe ghiuorno!
Ma chi v' 'o fa fa? Chi v' 'o fa fa? Vuie 'a me che nne vulite?!
Giesú Cristo mio, o mm' 'o benedice o t' 'o benedico!
E vedite che se vede a l'ebbreca nosta…
Eggia'!.. Se vedeno paricchie belli ccose!..
I' mme ne vaco! I' ccá mmiezo nun mme ce fido 'e sta cchiú. I' n'ato poco ca ce stonco se schiatta na vena 'mpietto!
Onna Ro', iammuncenne… Vuie site na femmena raggiunebbele… (via con lei, persuadendola)
'Onn'Amá, iatevenne pure vuie, sentite a stu servitore d' 'o vuosto, aggiate pacienzia. Ccá, 'a stammatina, io nun pozzo arrivà a mettere nu punto 'nfaccia a na scarpa!
'A strata é libbera!..
Io ve ringrazio, 'o ssapite! Aggio ubbricazione a vuie!
Cu me ll'avite?
Cu vuie proprio.
E avite sbagliato 'o palazzo.
'Onn'Amà, ve vo' 'a sie' Rosa.
Iate, iatela a cunzulà. Iatela a mbuttuná n'ato ppoco!
E pecchè v'amariggiate?
Faciteme 'o piacere, 'a ccá nun ce passate tanto spissamente… Si no po' essere pure ca ve ne pentite!..
Overamente?
'Onn'Amá…
Overamente, sì!
E po' vedimmo!.. (via, minacciosa)
'On Ví, nun ve pigliate collera!
'On Má, mme vulite fa sta barba?
Pronto! Iammuncenne. (entra, assieme all'avventore, nella bottega)
Aggia vedé si mme fanno turná a sosere! (Canta)
«Saglieno e scenneno li prufessore!
Ll'aggio perduta, nun c'è cchiú speranza!..
Nu catapláseme ncopp'a la panza…»
Rabbiè?
Gno'?
Te vo' don Peppino!
All'arma d' 'e mamme voste! Chesta é 'a quarta susuta! (avvicinandosi alla bottega di Marco) 'On Má, aggiate pacienza, si ascite date n'uocchio 'o bancariello! (via per la destra)
Mé, nun ve pigliate collera, nun ve n'incarricate cchiú!
M'hanno strutto, Rafé! Te dico a te ca m'hanno strutto! M'hanno nfracetato 'ncuorpo!..
E ba buono. Nun ce penzate cchiù, mo…
Mo vedimmo si mme fanno fa quacche brutta bestialitá. Lloro me mettesseno n' copp' 'o punto ca po' lle faccio abbedé io chi songo!
E ba buono. Vuie vulite sentí nu cunziglio d' 'o mio?.. (Fa per parlargli. Dalla finestra della mala casa una mano lancia una rosa. La rosa cade davanti a Vito)
Chi ha menata sta rosa?
Nun ce abbadate…
Chi é stato? (s'alza)
Rafe'?!..
Quaccheduna… 'A llá ncoppa…
E chi é? 'A saie tu?
Nun ce abbadate. Penzate 'a salute… Cheste ncuieteno 'a gente… (entra in bottega)